Սույն թվականի նոյեմբերի 13-14-ը Ֆրանսիայի Հանրապետության մայրաքաղաք Փարիզում տեղի է ունեցել EU4Energy տարածաշրջանային աշխատաժողովը՝ «Վերականգնվող էներգետիկ ռեսուրսների շուկայական ինտեգրում․ ճկունություն և ակտիվ սպառողներ» թեմայով։ Աշխատաժողովը կազմակերպվել էր Միջազգային էներգետիկ գործակալության (IEA) և Էներգետիկ համայնքի քարտուղարության կողմից՝ ԵՄ աջակցությամբ։   Հայկական պատվիրակության կազմում աշխատաժողովին մասնակցել է Հանրային ծառայությունները կարգավորող հանձնաժողովի նախագահի խորհրդական Գարիկ Չիլինգարյանը և ներկայացրել երկրի առաջընթացը՝ վերականգնվող էներգիայի ինտեգրման, էլեկտրաէներգետիկական շուկայի ազատականացման և ճկունության մեխանիզմների զարգացման ուղղությունները։   Հայկական կողմը ներկայացրել է Հայաստանի ընթացիկ բարեփոխումները՝ ընդգծելով «Էլեկտրաէներգետիկայի մասին» ՀՀ նոր օրենքի կարևորությունը, էլեկտրական էներգիայի կուտակիչների զարգացման ուղղությամբ առաջին քայլերը, էլեկտրոնային հաշվիչների լայնածավալ ներդրման, ինչպես նաև ակտիվ սպառողների ու ագրեգատորների ներգրավման անհրաժեշտությունը։   Միջոցառման ընթացքում Միջազգային էներգետիկ գործակալության (IEA), Էներգետիկ համայնքի քարտուղարության, ինչպես նաև միջազգային փորձագետների և գործընկերների հետ քննարկվել են էներգետիկ շուկաների զարգացումը, պահանջարկի արձագանքման ծրագրերի կիրառումը և էլեկտրաէներգիայի պահեստավորման կարգավորման լավագույն եվրոպական փորձը։   Աշխատաժողովի մասնակիցները բարձր են գնահատել Հայաստանի նախաձեռնողականությունը և համապարփակ բարեփոխումները, հատկապես վերականգնվող էներգիայի զարգացման և ինտեգրման գործում՝ ընդգծելով շարունակական համագործակցության և տեխնիկական աջակցության պատրաստակամությունը։    

  Սույն թվականի նոյեմբերի 27-ին ՀՀ հանրային ծառայությունները կարգավորող հանձնաժողովի նախաձեռնությամբ Երևանում կայացել է Եվրասիական տնտեսական միության բնական մենաշնորհների գծով խորհրդատվական կոմիտեի 31-րդ նիստը և բնական մենաշնորհների ոլորտում Եվրասիական տնտեսական միության անդամ պետությունների օրենսդրությունների ներդաշնակեցման համապատասխան միջոցների իրականացման հաջորդականության սահմանման միջոցառումների ծրագրի («Ճանապարհային քարտեզ») իրականացմանն ուղղված փաստաթղթերի նախապատրաստման հարցերով աշխատանքային խմբի նիստը։ Միջոցառման շրջանակում տեղի է ունեցել երկկողմ հանդիպում ՀՀ հանրային ծառայությունները կարգավորող հանձնաժողովի նախագահ Մեսրոպ Մեսրոպյանի և Եվրասիական տնտեսական հանձնաժողովի էներգետիկայի և ենթակառուցվածքների հարցերով Կոլեգիայի անդամ (նախարար) Արզիբեկ Կոժոշևի միջև, որի ընթացքում քննարկվել են Հայաստանի Հանրապետությունում հանրային ծառայությունների ոլորտները կարգավորող օրենսդրության առանձնահատկությունները, ինչպես նաև ՀԾԿՀ և ԵՏՀ հետագա համագործակցությանն առնչվող մի շարք հարցեր։    

Սույն թվականի նոյեմբերի 26-ի  նիստում ՀՀ հանրային ծառայությունները կարգավորող հանձնաժողովը սահմանել է «Վեոլիա ջուր» ՓԲԸ-ի կողմից բաժանորդներին խմելու ջրի մատակարարման և ջրահեռացման (կեղտաջրերի մաքրման) ծառայությունների մատուցման 2026 թվականի սակագները:   ·      Սոցիալապես անապահով բաժանորդների համար 2026 թվականին սակագինը՝ 180 դրամ, մյուս բոլոր բաժանորդների համար՝ 200,42 դրամ։   Հանձնաժողովի կողմից կատարված մոնիթորինգի արդյունքում հաշվարկվել է լրացուցիչ շուրջ 492000 խմ ծավալ, որը սակագնի վրա ունեցել է դրական ազդեցություն։ Բացի այդ,  դրական ազդեցություն է ունեցել նաև մանրածախ ջրամատակարարման ծավալի փոփոխությունը։    

  2026 թվականի հուլիսի 1-ից ուժի մեջ կմտնեն հանրային էլեկտրոնային հաղորդակցության ծառայությունների որակի նոր չափանիշներ    Հանձնաժողովի 2025 թվականի նոյեմբերի 19-ի նիստում ընդունված որոշման համաձայն սահմանվել են նոր կարգավորումներ՝ օպերատորների կողմից բաժանորդային պայմանագրերում հանրային էլեկտրոնային հաղորդակցության ծառայությունների որակի չափանիշների մասով ամրագրման ենթակա պայմանների առնչությամբ։ Մասնավորապես, դրանք վերաբերում են ինտերնետ հասանելիության ծառայությունների մատուցման որակի որոշակի չափանիշներին՝ բաժանորդային պայմանագրերում ամրագրման ենթակա տվյալների հոսքի արագությունների նկարագրությանը, միացման/ակտիվացման/վերաակտիվացման համար անհրաժեշտ ժամանակահատվածի և ծառայությունների որակի վերաբերյալ բաժանորդների բողոքներին արձագանքման ժամանակահատվածի սահմանմանը, ծառայությունների մատուցման ժամանակահատվածի հաշվարկի և ծառայությունների ակտիվացման նկարագրության, ներառյալ՝ ժամանակահատվածի տևողության, սկզբի և ավարտի, ժամանակահատվածը ներառող օրերի, ժամերի և րոպեների հաշվարկման մոտեցումների ու ծառայությունների ակտիվացման մանրամասն ընթացակարգի նախատեսմանը։ Սահմանվել են նաև օպերատորների կողմից բաժանորդային պայմանագրերում ամրագրման ենթակա կարգավորումներ՝ բաժանորդից անկախ տեխնիկական պատճառներով ծառայությունների որակի անկման կամ ծառայությունների ընդհատման (ներառյալ՝ խափանման կամ անսարքության) դեպքում` պատշաճ որակի կամ ընդհատված ծառայությունների վերականգնման համար անհրաժեշտ ժամանակահատվածի սահմանման, ինչպես նաև բաժանորդին տրամադրվող փոխհատուցման դեպքերի և կարգի մասով։ Կարգավորումների մշակման համար հիմքն է նաև ԵՄ-ում կիրառելի փորձը՝ հաշվի առնելով ՀՀ և ԵՄ միջև կնքված համապարփակ և ընդլայնված գործընկերության համաձայնագրով (ՀԳՀՄ/CEPA) ամրագրված օրենսդրության մոտարկման պարտավորությունները: