Լրահոս

Էլեկտրաէներգետիկական շուկայի աստիճանական ազատականացումն ապահովելու նպատակով ՀՀ հանրային ծառայությունները կարգավորող հանձնաժողովի այսօրվա նիստում ընդունվել են էլեկտրաէներգետիկական մանրածախ շուկայի առևտրային կանոններում առաջարկվող փոփոխությունները։ Համաձայն էլեկտրաէներգետիկական մանրածախ շուկայի գործող առևտրային կանոնների՝ շուկայի մրցակցային հատված դուրս գալու պարտավորություն ունեցող սպառողների համար ժամանակացույց էր սահմանված մինչև 2026 թվականի փետրվարի 1-ը։ Ընդունված որոշմամբ շուկայի ազատականացման հետագա ընթացքն անխոչընդոտ ապահովելու նպատակով որակավորված սպառողի կարգավիճակ ստանալու կամ մատակարար ընտրելու պարտավորության ժամկետ է սահմանվել նախորդ օրացուցային տարում իրենց բոլոր՝ 12 հազար կՎտժ սպառումը գերազանցող առևտրային հաշվառքի սարքերով սպառում ունեցող մանրածախ շուկայի հետևյալ սպառողների համար՝ 1) 500 հազար կՎտժ-ից մինչև 1 մլն կՎտժ սպառում ունեցող սպառողներ՝ 2027 թվականի փետրվարի 1-ը, 2) 250 հազար կՎտժ-ից մինչև 500 հազար կՎտժ սպառում ունեցող սպառողներ՝ 2028 թվականի փետրվարի 1-ը, 3) 100 հազար կՎտժ-ից մինչև 250 հազար կՎտժ սպառում ունեցող սպառողներ՝ 2029 թվականի փետրվարի 1-ը, և 4) 50 հազար կՎտժ-ից մինչև 100 հազար կՎտժ սպառում ունեցող սպառողներ՝ 2030 թվականի փետրվարի 1-ը:

Հանրային շարժական կապի 5G տեխնոլոգիայի ցանցերի ներդրման և զարգացման նպատակով ռադիոհաճախականությունների տրամադրման մրցութային գործընթացի իրականացման արդյունքներով 2300-2350ՄՀց, 2350-2400ՄՀց ռադիոհաճախականությունների հատվածների մրցույթների հաղթող ճանաչված «Վիվա Արմենիա» ՓԲԸ-ին ՀՀ հանրային ծառայությունները կարգավորող հանձնաժողովի 2025 թվականի ապրիլի 2-ին կայացած նիստով տրամադրվել են ռադիոհաճախականությունների օգտագործման թույլտվություններ։ Տրամադրված թույլտվություններով սահմանված պարտավորությունների կատարման արդյունքում 3-7 տարվա ընթացքում՝ ըստ ժամանակացույցի, հանրապետության քաղաքային յուրաքանչյուր բնակավայրում՝ համապատասխան բնակավայրի վարչական (կադաստրային) տարածքի առնվազն 60%-ում, ներառյալ՝ «Ինժեներական քաղաքի», «Ակադեմիական քաղաքի», Զվարթնոց, Գյումրու և Կապանի օդանավակայանների, ՀՀ սահմանային բոլոր գործող և նոր կառուցվող մաքասակետերի տարածքներում հասանելի կլինի շարժական կապի լայնաշերտ 5G տեխնոլոգիայի ծառայությունները (բացօթյա/outdoor ծածկույթ), իսկ հանրապետության ընդհանուր օգտագործման միջպետական նշանակության ավտոմոբիլային ճանապարհների (ներառյալ նոր կառուցվող) ընդհանուր երկարության 98%-ում՝ լայնաշերտ ինտերնետային բացօթյա (outdoor) ծածկույթը (որից առնվազն 10%-ը՝ 5G տեխնոլոգիայով)։ Մրցութային հիմունքներով նշված ռադիոհաճախականությունների տրամադրմամբ ապահովվել են 2,5 մլրդ դրամի միանվագ (տրամադրման մասով), իսկ հետագայում նաև 1,68 մլրդ դրամ տարեկան (օգտագործման մասով) պետական բյուջեի լրացուցիչ մուտքեր, ռադիոհաճախականությունների օգտագործման պարտադիր վճարների մասով ներկայումս տարեկան շուրջ 8,6 մլրդ դրամի պետական բյուջեի մուտքերը հասցնելով ավելի քան 10 մլրդ դրամի։

Տեղեկացնում ենք, որ 2025 թվականի ապրիլի 3-ին ժամը 11:00-ին տեղի կունենա ՀՀ հանրային ծառայությունները կարգավորող հանձնաժողովի 2026-2028թթ. միջնաժամկետ ծախսերի ծրագրի (ներառյալ՝ 2026 թվականի բյուջետային ֆինանսավորման հայտի) նախագծի, ինչպես նաև հայտի հիմքում դրված ծախսային հաշվարկ-հիմնավորումների վերաբերյալ հանրային քննարկում: Միաժամանակ, վերը նշված քննարկմանը մասնակցելու նպատակով հետաքրքրություն ցուցաբերած անձանց խնդրում ենք մինչև 03.04.2025թ. ժամը 09:30 գրանցվել՝ իրենց տվյալները ներկայացնելով hsafaryan@psrc.am էլեկտրոնային փոստին կամ զանգահարելով (015) 588 855 հեռախոսահամարին։

Հեռահաղորդակցության միջազգային միությունը (ՀՄՄ) ՀՀ բարձր տեխնոլոգիաների նախարարության, Հանրային ծառայությունները կարգավորող հանձնաժողովի (ՀԾԿՀ) և Հայաստանի օպերատորների միության աջակցությամբ Երևանում այս օրերին անցկացնում է Հեռահաղորդակցության ոլորտի տեխնոշաբաթ։ Տեխնոշաբաթի շրջանակում կազմակերպվում են միջոցառումներ և համաժողովներ, որոնց նպատակն է քննարկել հեռահաղորդակցության ոլորտի զարգացման միտումները, մարտահրավերները, ինչպես նաև ուսումնասիրել միջազգային լավագույն փորձը։ «Ապագայի կապի տեխնոլոգիաներ»  խորագրով համաժողովին բանախոսությամբ հանդես է եկել ՀՀ հանրային ծառայությունները կարգավորող հանձնաժողովի հեռահաղորդակցության վարչության պետ Արմեն Հունանյանը՝ ներկայացնելով ՀՀ հեռահաղորդակցության բնագավառի նախաձեռնություններն ու պետական կարգավորման մոտեցումները։ Այս կապակցությամբ Հեռահաղորդակցության միջազգային միության ներկայացուցչի կողմից ընդգծվել է հեռահաղորդակցության բնագավառի կարգավորման Հայաստանյան օրինակելի փորձն ու դրա ազդեցությունը ոլորտի զարգացմանը, ինչով պայմանավորված էլ Հայաստանի Հանրապետությունը ՀՄՄ-ի կողմից, որպես հեռահաղորդակցության ոլորտի համագործակցային և թիրախային կարգավորում իրականացնող, ԱՊՀ տարածաշրջանում ստացել է ամենաբարձր գնահատականը։ Միջոցառմանը մասնակցում են հեռահաղորդակցության ոլորտի Հայաստանի Հանրապետության և միջազգային փորձագետներ՝ ներկայացնելով ժամանակակից տեխնոլոգիաներ, ոլորտային քաղաքականության և կարգավորման ձևավորմանն աջակցող գործիքներ, միջազգային փորձի օրինակներ։