Տեղեկացնում ենք, որ 2025 թվականի ապրիլի 3-ին ժամը 11:00-ին տեղի կունենա ՀՀ հանրային ծառայությունները կարգավորող հանձնաժողովի 2026-2028թթ. միջնաժամկետ ծախսերի ծրագրի (ներառյալ՝ 2026 թվականի բյուջետային ֆինանսավորման հայտի) նախագծի, ինչպես նաև հայտի հիմքում դրված ծախսային հաշվարկ-հիմնավորումների վերաբերյալ հանրային քննարկում: Միաժամանակ, վերը նշված քննարկմանը մասնակցելու նպատակով հետաքրքրություն ցուցաբերած անձանց խնդրում ենք մինչև 03.04.2025թ. ժամը 09:30 գրանցվել՝ իրենց տվյալները ներկայացնելով hsafaryan@psrc.am էլեկտրոնային փոստին կամ զանգահարելով (015) 588 855 հեռախոսահամարին։

Հեռահաղորդակցության միջազգային միությունը (ՀՄՄ) ՀՀ բարձր տեխնոլոգիաների նախարարության, Հանրային ծառայությունները կարգավորող հանձնաժողովի (ՀԾԿՀ) և Հայաստանի օպերատորների միության աջակցությամբ Երևանում այս օրերին անցկացնում է Հեռահաղորդակցության ոլորտի տեխնոշաբաթ։ Տեխնոշաբաթի շրջանակում կազմակերպվում են միջոցառումներ և համաժողովներ, որոնց նպատակն է քննարկել հեռահաղորդակցության ոլորտի զարգացման միտումները, մարտահրավերները, ինչպես նաև ուսումնասիրել միջազգային լավագույն փորձը։ «Ապագայի կապի տեխնոլոգիաներ»  խորագրով համաժողովին բանախոսությամբ հանդես է եկել ՀՀ հանրային ծառայությունները կարգավորող հանձնաժողովի հեռահաղորդակցության վարչության պետ Արմեն Հունանյանը՝ ներկայացնելով ՀՀ հեռահաղորդակցության բնագավառի նախաձեռնություններն ու պետական կարգավորման մոտեցումները։ Այս կապակցությամբ Հեռահաղորդակցության միջազգային միության ներկայացուցչի կողմից ընդգծվել է հեռահաղորդակցության բնագավառի կարգավորման Հայաստանյան օրինակելի փորձն ու դրա ազդեցությունը ոլորտի զարգացմանը, ինչով պայմանավորված էլ Հայաստանի Հանրապետությունը ՀՄՄ-ի կողմից, որպես հեռահաղորդակցության ոլորտի համագործակցային և թիրախային կարգավորում իրականացնող, ԱՊՀ տարածաշրջանում ստացել է ամենաբարձր գնահատականը։ Միջոցառմանը մասնակցում են հեռահաղորդակցության ոլորտի Հայաստանի Հանրապետության և միջազգային փորձագետներ՝ ներկայացնելով ժամանակակից տեխնոլոգիաներ, ոլորտային քաղաքականության և կարգավորման ձևավորմանն աջակցող գործիքներ, միջազգային փորձի օրինակներ։  

ՀՀ հանրային ծառայությունները կարգավորող հանձնաժողովը այսօրվա նիստում տուգանել է «Հայաստանի էլեկտրական ցանցեր» ՓԲԸ-ին՝ 10 մլն դրամի և «Էլեկտրաէներգետիկական համակարգի օպերատոր» ՓԲԸ-ին՝ 1 մլն դրամի չափով։ Մասնավորապես՝ 1. «Հայաստանի էլեկտրական ցանցեր» ՓԲԸ-ի նկատմամբ տուգանքի կիրառումը պայմանավորված է ընկերության լիցենզիայի պայմանների 37-րդ և 38-րդ կետերի խախտման հանգամանքով, այն է ընկերությունը 2025 թվականի փետրվարի 1-ից էլեկտրաէներգետիկական շուկայի մրցակցային հատված դուրս գալու պարտադրանք ունեցող սպառողների մասով ներկայացրել է ոչ հավաստի տեղեկատվություն, ինչն ավելի ուշ ճշտվել է, սակայն ժամանակին ճշգրիտ տեղեկատվության չներկայացման արդյունքում խոչընդոտվել է հանձնաժողովի՝ կարգավորման գործառույթների պատշաճ իրականացումը, ինչպես նաև խախտվել են մի խումբ սպառողների իրավունքները և օրինական շահերը, 2. «Էլեկտրաէներգետիկական համակարգի օպերատոր» ՓԲԸ-ի նկատմամբ տուգանքի կիրառումը պայմանավորված է էլեկտրաէներգետիկական հաղորդման ցանցային կանոնների 84-րդ և 152.1-ին կետերով սահմանված պահանջների խախտման հանգամանքով, այն է համակարգի օպերատորի կարգավարական հրահանգով 2025 թվականի հունվարի 2-ին ժամը 14։00-ից մինչև հունվարի 4-ը, ժամը` 14։00-ն «Արմփաուեր» ՓԲԸ-ի էներգաբլոկն անջատվել է՝ «Հայաստանի էլեկտրական ցանցեր» ՓԲԸ-ում առաջացնելով էլեկտրական էներգիայի գնման ծախսի ավելացում, մինչդեռ նշված կանոնների 84-րդ և 152.1-ին կետերի համաձայն համակարգի օպերատորը էլեկտրական էներգիայի տարեկան հաշվեկշռի ճշտումները կատարելիս կարող էր փոխել «Արմփաուեր» ՓԲԸ-ի կայանի արտադրության գրաֆիկը՝ «Հայաստանի էլեկտրական ցանցեր» ՓԲԸ-ի էլեկտրական էներգիայի գնման ծախսերը նվազագույնի հասցնելու նպատակով։  

Ս.թ. մարտի 20-ին ՀՀ հանրային ծառայությունները կարգավորող հանձնաժողովի (ՀԾԿՀ) նախագահ Մեսրոպ Մեսրոպյանն առաջին պաշտոնական հանդիպումն ունեցավ սպառողների իրավունքների պաշտպանությամբ զբաղվող հասարակական կազմակերպությունների (ՀԿ) ներկայացուցիչների հետ։ Հանդիպմանը մասնակցել են նաև ՀԾԿՀ անդամները և ղեկավար կազմը: Բացման խոսքում ՀԾԿՀ նախագահը հակիրճ ուրվագծեց կարգավորվող ոլորտներում առկա իրավիճակը, վերհանեց հիմնական մարտահրավերները և ներկայացրեց հնարավոր լուծումները։ Ընդգծվեց Հանձնաժողովի նվիրվածությունը թափանցիկության, արդարության և սպառողների պաշտպանությանը` շեշտելով երկխոսության հաստատման և քաղաքացիական հասարակության հետ ամուր համագործակցության կարևորությունը: «ՀԿ-ների դերը վճռորոշ է սպառողների իրավունքների պաշտպանության, սոցիալական արդարության խթանման և հաշվետվողականության ապահովման գործում: Մենք այս հանդիպումը տեսնում ենք որպես երկարաժամկետ գործընկերության սկիզբ՝ ուղղված հասարակության շահերին ծառայելու և մեր կողմից կարգավորվող ոլորտների զարգացմանը»,-ասաց ՀԾԿՀ նախագահ Մեսրոպյանը: Հանդիպման ընթացքում ՀԿ-ների ներկայացուցիչները բարձրացրեցին իրենց հուզող հարցերը, որոնց տրվեցին մանրամասն պատասխաններ: Ընդունելով, որ և՛ ՀԾԿՀ-ի, և՛ ՀԿ-ների վերջնական նպատակները համընկնում են՝ այն է՝ պաշտպանել սպառողների շահերը և խթանել կարգավորվող ոլորտների կայուն զարգացումը, կողմերը համաձայնեցին ամրապնդել համագործակցությունը: Որոշվեց նման հանդիպումներ անցկացնել կանոնավոր կերպով և ուսումնասիրել շարունակական ներգրավվածության և տեղեկատվության փոխանակման լրացուցիչ մեխանիզմներ: ՀԾԿՀ-ն վերահաստատում է իր հանձնառությունը՝ պահպանել բաց դռների քաղաքականությունը և ակտիվորեն ներգրավել քաղաքացիական հասարակությանն իր աշխատանքում՝ ապահովելու, որ սպառողների ձայնը լսվի և հաշվի առնվի Հանձնաժողովի որոշումների կայացման գործընթացում: