Հաշվի առնելով 2024 թվականի սեպտեմբերի 19-ից սկսված՝ էլեկտրաէներգետիկական համակարգի խոշոր արտադրող կայանների և ծառայություններ մատուցող ընկերությունների սակագների վերանայման գործընթացի շրջանակում էլեկտրաէներգետիկական համակարգի սակագների վրա ազդեցություն ունեցող գործոնների վերլուծության արդյունքները` «Հայաստանի էլեկտրական ցանցեր» ՓԲԸ-ի կողմից սպառողներին վաճառվող էլեկտրական էներգիայի սակագների վերանայման անհրաժեշտություն չի առաջացել։ Միաժամանակ, նպատակ ունենալով ապահովել էլեկտրաէներգետիկական շուկայի բնականոն գործունեության շարունակականությունը, ի թիվս համակարգում մատուցվող ծառայությունների և մատակարարվող էլեկտրական էներգիայի կարգավորվող սակագների, անհրաժեշտություն է առաջացել վերանայել նաև էլեկտրաէներգետիկական մեծածախ և մանրածախ շուկաների առևտրային կանոններով սահմանված ժամկետում և կարգով որակավորված սպառողի կարգավիճակ չստացած կամ էլեկտրական էներգիայի այլ մատակարար չընտրած սպառողներին վաճառվող էլեկտրական էներգիայի սակագները։ Հաշվի առնելով վերոգրյալը՝ ի լրումն 2024 թվականի սեպտեմբերի 19-ից սկսած սակագների վերանայման գործընթացի հանձնաժողովն իր նախաձեռնությամբ սկսել է նաև երաշխավորված մատակարարի կողմից որակավորված սպառողի կարգավիճակ չստացած կամ էլեկտրական էներգիայի այլ մատակարար չընտրած սպառողներին վաճառվող էլեկտրական էներգիայի, ինչպես նաև 30 ՄՎտ և ավելի տեղակայված հզորությամբ ջերմաէլեկտրակայանների կողմից սպառվող բնական գազի սակագների վերանայման գործընթաց։

Դեկտեմբերի 18-ին տեղի է ունեցել աշխատանքային հանդիպում ՀՀ-ԵՄ համապարփակ և ընդլայնված գործընկերության համաձայնագրի կիրարկման հարցերով ՀՀ կառավարության խորհրդական Խոսե Իգնասիո Պռադաս-Պովեդայի հետ։ Քննարկվել է ՀՀ-ԵՄ համապարփակ և ընդլայնված գործընկերության համաձայնագրի կիրարկման ճանապարհային քարտեզի էներգետիկայի ոլորտին վերաբերող կետերի իրականացման ընթացքը։ ՀԾԿՀ նախագահ Մեսրոպյանը շեշտել է, որ ՀՀ էներգետիկ ոլորտում առկա մարտահրավերների հաղթահարման գործում ԵՄ աջակցությունն ու համագործակցությունը կարևոր դերակատարում ունեն։ Հանդիպման շրջանակում ուշադրություն է դարձվել համապարփակ ծրագրերի ընթացքին, ինչպես նաև նշվել են այն խնդիրները, որոնք պահանջում են աջակցություն։ Մասնավորապես, քննարկվել են հանձնաժողովի կարիքները և այն միջոցները, որոնք անհրաժեշտ են էներգետիկայի ոլորտի օրենսդրական բարեփոխումների արդյունավետ իրականացման համար։ Կողմերը պայմանավորվել են շարունակել համատեղ ծրագրերը՝ ապահովելով արդյունավետ համագործակցություն։

  ՀՀ Հանրային ծառայությունները կարգավորող հանձնաժողովը 2024 թվականի դեկտեմբերի 18-ի նիստում քննարկել և ընդունել է շարժական կապի 5G տեխնոլոգիայի ներդրման վերաբերյալ որոշումներ։ Դրանք վերաբերում են համապատասխան ռադիոհաճախականությունների օգտագործման թույլտվություններ տրամադրելու նպատակով մրցույթների կազմակերպման կանոնների սահմանմանը, ինչպես նաև թույլտվությունների տրամադրման համար մրցութային հանձնաժողովի ստեղծմանն ու նրա աշխատակարգի հաստատմանը։ Նշված մրցույթների իրականացմամբ նախատեսվում է ապահովել շարժական կապի լայնաշերտ լիարժեք 5G տեխնոլոգիային բնորոշ տվյալների հաղորդման բարձր արագություններով և ցանցի փոքր ընդհատումներով ծառայությունների հասանելիություն (բացօթյա ծածկույթ) հանրապետության քաղաքային յուրաքանչյուր բնակավայրում՝ համապատասխան բնակավայրի վարչական (կադաստրային) տարածքի առնվազն 60 տոկոսում, ներառյալ՝ «Ինժեներական քաղաքի», «Ակադեմիական քաղաքի», Զվարթնոց, Գյումրու և Կապանի օդանավակայանների, ՀՀ սահմանային բոլոր գործող և նոր կառուցվող մաքսակետերի տարածքներում, ինչպես նաև հանրապետության ընդհանուր օգտագործման միջպետական նշանակության ավտոմոբիլային ճանապարհների (ներառյալ նոր կառուցվող) ընդհանուր երկարության 98 տոկոսում լայնաշերտ ինտերնետային բացօթյա (outdoor) ծածկույթ (որից առնվազն 10 տոկոսը՝ շարժական լայնաշերտ կապի 5G տեխնոլոգիայով)։   

Այսօր ՀԾԿՀ նախագահ Մեսրոպ Մեսրոպյանն ընդունեց Հեռահաղորդակցության միջազգային միության (ITU) ԱՊՀ տարածաշրջանի գրասենյակի ղեկավար Նատալիա Մոչուին։ Նախագահ Մեսրոպյանը ողջունեց հյուրերին, շնորհակալություն հայտնեց արդյունավետ համագործակցության համար և ընդգծեց, որ Հանձնաժողովը կշարունակի համագործակցությունը՝ նպաստելով հեռահաղորդակցության ոլորտի զարգացմանը։ Քննարկվեցին հեռահաղորդակցության ոլորտի զարգացմանը նպաստող՝ ոլորտի կարգավորման մի շարք առաջնահերթ ուղղությունների մասով Հեռահաղորդակցության միջազգային միության (ITU) հետ հետագա փոխգործակցության ծրագրերը։