Սույն թվականի սեպտեմբերի 23-ին ՀՀ հանրային ծառայությունները կարգավորող հանձնաժողովում տեղի է ունեցել հանդիպում Համաշխարհային բանկի ներկայացուցիչների հետ՝ «Ջրամատակարարման և ոռոգման ծառայությունների բարելավման» (WISE) ծրագրի շրջանակում իրականացվելիք աշխատանքների վերաբերյալ։   Հանդիպման ընթացքում ներկայացվել են խմելու ջրի մատակարարման և ոռոգման ծառայությունների սակագների ձևավորման մեխանիզմները, հիմնական սկզբունքներն ու կիրառվող մոտեցումները։   Քննարկվել են ոլորտներում իրականացվող բարեփոխումները, կարգավորման արդյունավետության բարձրացմանն ուղղված մոտեցումները և հետագա զարգացման առաջնահերթությունները։   Կողմերը կարևորել են համագործակցության շարունակականությունը և ոլորտներում իրականացվող աշխատանքների համակարգված իրականացումը։         

  Սեպտեմբերի 21-24-ը Թբիլիսիում անցկացվող Էներգետիկայի կարգավորման 9-րդ համաշխարհային ֆորումի (WFER IX) շրջանակում ելույթ է ունեցել ՀՀ հանրային ծառայությունները կարգավորող հանձնաժողովի անդամ Սերգեյ Աղինյանը։   «Արդար անցում․ հավասարության և ներառականության ապահովումը էներգետիկ բարեփոխումներում» խորագրով քննարկման շրջանակում Աղինյանը ներկայացրել է էներգետիկ անցման սոցիալական և տնտեսական ազդեցությունները, էներգիայի հասանելիության և մատչելիության ապահովման, ինչպես նաև առավել խոցելի խմբերի շահերի պաշտպանությանն առնչվող թեմաները։   Քննարկման ընթացքում կարևորվել են էներգետիկ ոլորտի վերափոխման գործընթացում կարգավորող մարմինների դերը, կայուն և մատչելի էներգիայի հասանելիության ապահովումը, վերականգնվող էներգետիկայի զարգացումն ու էներգետիկ աղքատության հաղթահարմանն ուղղված մոտեցումները։       

Թբիլիսիում անցկացվող Էներգետիկայի կարգավորման 9-րդ համաշխարհային ֆորումի (WFER IX) շրջանակում ՀՀ հանրային ծառայությունները կարգավորող հանձնաժողովի նախագահ Մեսրոպ Մեսրոպյանը հանդիպել է Եվրոպական էներգետիկ կարգավորողների խորհրդի (CEER) նախագահ Պեդրո Վերդելյոյի և EU4Energy ծրագրի ներկայացուցիչների հետ։ Հանդիպմանը մասնակցել են նաև Վրաստանի էներգետիկայի և ջրամատակարարման կարգավորող ազգային հանձնաժողովի (GNERC) նախագահ Դավիթ Նարմանիան և Ադրբեջանի Հանրապետության էներգետիկայի կարգավորող գործակալության (AERA) խորհրդի նախագահ Սամիր Ախոնդովը։ Մեսրոպ Մեսրոպյանը շնորհակալություն է հայտնել Հայաստանի էներգետիկայի ոլորտի կարգավորման ուղղությամբ ցուցաբերվող տեխնիկական աջակցության և ձևավորված սերտ համագործակցության համար։ ՀԾԿՀ նախագահն ընդգծել է նաև էներգետիկայի ոլորտի օրենսդրությամբ նախատեսված կուտակիչ կայանների կառուցման համար անհրաժեշտ ենթաօրենսդրական ակտերի մշակման ուղղությամբ ցուցաբերվող աջակցության կարևորությունը։ Հանդիպման ընթացքում քննարկվել են Հարավային Կովկասի երկրների էներգահամակարգերի փոխադարձ ինտեգրման և տարածաշրջանային էներգետիկ համագործակցության խորացման հնարավորությունները, ինչպես նաև տարածաշրջանի էներգահամակարգերը Թուրքիայի էներգետիկ համակարգին միացնելու ուղղությամբ հնարավոր քայլերը։    

  Թբիլիսիում մեկնարկել է Էներգետիկայի կարգավորման 9-րդ համաշխարհային ֆորումը (WFER IX), որին մասնակցում է նաև ՀԾԿՀ պատվիրակությունը՝ ՀՀ հանրային ծառայությունները կարգավորող հանձնաժողովի նախագահ Մեսրոպ Մեսրոպյանի գլխավորությամբ։   Ֆորումը համախմբել է աշխարհի տարբեր երկրների էներգետիկ կարգավորող մարմինների ներկայացուցիչներին, ոլորտի փորձագետներին և միջազգային կազմակերպությունների ներկայացուցիչներին։   Քննարկումների առանցքում են էներգետիկ ոլորտի անցումը դեպի ավելի մաքուր և կայուն էներգետիկ համակարգեր, էլեկտրաէներգետիկական ցանցերի զարգացման և արդիականացմանն ուղղված ներդրումները, տարածաշրջանային էներգետիկ շուկաների ինտեգրումը, սպառողների իրավունքների և շահերի պաշտպանությունը, ինչպես նաև էներգետիկ աղքատության հաղթահարումը։   Օրակարգում են նաև էներգիայի կուտակման համակարգերի զարգացումն ու կարգավորումը, կանաչ ջրածնի կիրառումն ու զարգացումը, էներգետիկ ենթակառուցվածքների կիբերանվտանգությունը և նորարարական տեխնոլոգիաների կիրառումը էներգետիկ ոլորտում։   Ֆորումի շրջանակում առանձին ուշադրություն է դարձվում էներգետիկ անցման պայմաններում կարգավորողների առջև ծառացած մարտահրավերներին, նոր ներդրումների խթանմանն ու սպառողների շահերի պաշտպանության հավասարակշռմանը։   WFER-ը էներգետիկ կարգավորման ոլորտի խոշորագույն միջազգային հարթակներից է, որտեղ տարբեր երկրների կարգավորող մարմինների ներկայացուցիչներն ու ոլորտի մասնագետները քննարկում են էներգետիկ ոլորտի զարգացման գլոբալ և տարածաշրջանային մարտահրավերները։