Սույն թվականի փետրվարի 11-ի հանձնաժողովի նիստում քննարկվել են  էլեկտրաէներգետիկական շուկայի ցանցային և առևտրային կանոնների նոր փոփոխությունները։

Փոփոխությունները միտված են ապահովելու էլեկտրաէներգետիկական համակարգի հուսալիությունն ու անվտանգությունը։ Մասնավորապես, արևային կայանների արտադրանքի շարունակական աճի պայմաններում էներգահամակարգում գերբեռնումների կանխման նպատակով ամենօրյա ռեժիմով ցանցից անջատվում և (կամ) բեռնաթափում են ատոմային էլեկտրակայանը, Երևանի ՋԷԿ-ի և Արմփաուեր-ի ջերմաէլեկտրակայանները՝ ստեղծելով հնարավոր համակարգային վթարների առաջացման լուրջ ռիսկեր։

Առաջարկվող փոփոխություններով նախատեսվել են կարգավորումներ, որոնց համաձայն Համակարգի օպերատորը կարգավարման գործընթացի շրջանակում կարող է սահմանափակել մինչև 30 ՄՎտ հզորությամբ վերականգնվող էներգետիկ ռեսուրսների կիրառմամբ գործող և պետություն-մասնավոր գործընկերության պայմանագրերի շրջանակում միադրույք սակագնային համակարգում գործող գնման երաշխիք ունեցող կայաններից էլեկտրական էներգիայի առաքումն էլեկտրական ցանց։ Միաժամանակ սահմանվել են նշված իրավահարաբերությունների հետ կապված վճարման (փոխհատուցման) մեխանիզմները։

Որոշումներն ուժի մեջ կմտնեն 2026 թվականի մարտի 1-ից։